Македонци од Канада донираа 116.000 долари за националните интереси

На донаторски банкет одржан викендот во соборниот храм „Свети Климент Охридски“ на Македонска православна црква во Торонто се собрани 116.000 канадски долари наменети за одбрана на македонските национални интереси.

Крсте и Гордана Ивановски со семејството донираа 50.000 канадски долари, Милчо Отас Ташев 6.000, а Славе Димитров со семејството 5.000, соопшти Македонска координативна мрежа-Канада.

„Донаторската акција не запира тука. Очекуваме уште донации, кои се многу важни без оглед на сумата, а ќе бидат употребени за одбрана на македонските национални интереси“, изјави Боби Темелков, претседател на Светски македонски конгрес-Канада.

Донаторскиот банкет го организираа СМК-Канада, Македонско меѓународно движење за човекови права (МХРМИ), Обединети Македонци-Канада и Здружение „Андон Лазов Јанев-Ќосето“ од Торонто, обединети во Македонска координативна мрежа-Канада, како и македонските православни црковни општини и македонската заедница во Канада.