Ни реформи ни напредок: Бугарија прва во ЕУ според сивата економија

Речиси 30 проценти изнесува сивата економија во Бугарија, со што официјална Софија е прва во ЕУ според овој показател.

Во истражувањето на ММФ со кое се опфатени 158 држави во светот, се наведува дека во Бугарија во 2017 година на сивата економија отпаѓале 29,6 отсто. По Бугарија се Турција со 27,2 отсто и Романија со 26,3 проценти.

Просечното ниво на сивиот сектор во Бугарија за периодот ‎1991-2015 година изнесувало 29,17 отсто. Романија, за тој десетгодишен период во просек сивата економија изнесувала 30,14 отсто, а на Малта 29,8 проценти. Надвор од ЕУ, слични вредности за сивата економија има и во Турција – 31,38 проценти и Брунеи – 29,76 отсто.

Најдобро рангирана европска држава во 2017 година е Швајцарија, каде на сивата економија отпаѓа едвај шест отсто, а потоа следуваат Австрија со 7,1 процент и Луксембург со 8,2 отсто. По нив е Холандија со 8,4 отсто неформална економија. Грција, чија економија во последната декада се соочува со сериозни предизвици, минатата година имала 21,5 проценти сива економија.