Со прогнозиран економски раст од 1,5 процент годинава, Македонија го дели второто место со Белорусија меѓу 37 земји во кои оперира Европската банка за обнова и развој (ЕБРД) во моментов.
Полош од Македонија меѓу државите од Северна Африка преку Источна Европа (плус Грција и Кипар) до средна Азија е само Азербејџан, единствен со негативен раст од 0,5 процент.
Малку подобра е прогнозата на ЕБРД за растот на македонската економија во 2018 година, за која се очекува позитива од 2,5 отсто, колку и за Кипар, Јордан и Либан, а зад нив се Азербејџан и Белорусија со по 2 проценти, како и Грција со 2,2.
Највисок раст во тековната година од 6,5 отсто меѓу 37. земји од Мароко до Монголија треба да има Таџикистин, а в година Узбекистан од 6,2 проценти.
Од европските држави на врвот е Романија и за годинава со 5,3 отсто, и за следната со 4,2.
Просечниот прогнозиран раст на државите „под капата“ на ЕБРД без Русија, со која ги прекина односите по конфликтот во Украина, за годинава е 3,3 проценти, а за идната 3,0.