„Крај на преговорите за името на државата Македонија и идентитетот на Македонскиот народ“, “Никогаш повеќе војна“, „Простуваме но, не забораваме, бараме извинување и репарации!“, порачаа денеска организаторите на Петтата Светската средба на насилно прогонетите Македонци од Егејскиот дел на Македонија за време на Граѓанската војна во Грција 1946-1949 година.

Посебна порака со оваа содржина беше испратена до претседателите, владите и парламентите на Македонија и на Грција и до меѓународната заедница.

Свечениот собир започна претпладнево со полагање свежо цвеќе на Споменикот на децата бегалци во Парк Жена Борец, и продолжи во Домот на АРМ со Изложба “70 години од прогонот на децата бегалци од Егејскиот дел на Македонија 1948-2018“.

Помеѓу 28 000 и 32 000 деца на возраст помеѓу 2 и 14 години, пролетта 1948 година организирано биле „евакуирани“ од страна на Демократската армија на Грција (ДАГ) пред „финалето“ на Граѓанската војна во Грција.

Со спогодбата помеѓу Привремената демократска влада на Грција и источноевропските земји (март–април 1948) Југославија прими 11.000, Романија 5.000 Чехословачка 3.000,Полска 2.500, Унгарија 2.800, Бугарија 2.500 и во Источна Германија 1.120 деца, на кои асо децении им беше забранувано да патуваат во Грција.

Цвеќе пред споменикот положија претставници од Кабинетот на претседателот на државата и од Светскиот македонски конгрес. Присутните извикуваа „Македонија, Македонија“.

„Ова е протест и против договорот за велепредавство меѓу Димитров и Коѕијас“, рекоа учесниците, пренесува Макфакс.

За  утре е планиран пикник на Катлановска бања со полагање свежо цвеќе на Споменикот на борците на ДАГ од Граѓанската војна во Грција 1946-1949, панихида со свештеници од Скопската епархија на МПЦ, поздравни говори и пригодна културно-уметничка програма.

SHARE

Comments are closed.