Бугарски ексдипломати го „растурија“ Борисов за бојкотот кон Иванов

Поранешните бугарски амбасадори Александар Јорданов и Велизар Енчев го критикуваа премиерот Бојко Борисов за откажувањето на средбата со македонскиот претседател Ѓорге Иванов при неговата посета на Софија пред два дена.

„Така не прават европски лидери. Многу подобро ќе беше ако бугарскиот премиер ја претставеше бугарската поизиција во врска со договорот за името ‘Северна Македонија’“, изјави првиот амбасадор на Бугарија во Македонија, Јорданов, во денешната утринска емисија на приватната телевизија БТВ.

„Дали Борисов би се однесувал така и со грчката опозиција, која, исто како Иванов, е против името, но, пак, е дел од Европска народна партија (ЕПП). Во рамките на ЕПП Борисов е понизок од тревата“, рече ексамбасадорот во Загреб, Енчев, кој бојкотот кон Иванов го оцени како скандалозен. Според него, премиерот си дозволува такво однесување, зошто „се совпаѓа со позицијата на неговите господари во ЕУ“!.

Двајцата поранешни дипломати се согласуваат дека со договорот Заев-Ципрас си ги остваруваат интересите и Скопје, и Атина, а губи Софија.

„Грција и Македонија идеално си ги постигнаа целите. Грција го отсече како со нож сè она што може да биде македонска претензија кон антиката. Македонската страна, пак, ја заштити македонистичката теза дека Македонците претставуваат одделен народ, со различен јазик, култура и историја“, објасни Јорданов.

Од своја страна, Енчев е на ставот дека Бугарија допрва ќе се најде во ситуација да преговара за историјата со најголемите антибугарски македонисти, кои имаат на своја страна меѓународен договор, според кој се одделен народ. Според него, името „Северна Македонија“ содржи територијални претензии спрема Бугарија.

 

4 Коментари

  1. Ха, ха, ха. Се гледа зошто го напаѓале Борисов. Не ги болело за Иванов. Ги болело што со договорот добивале Скопје и Атина, а губела Софија. Ги болело што македонската страна ја заштитила „мекедонистичката“ теза дека Македонците претставуваат одделен народ, со различен јазик, култура и историја. Бугарските дипломати ПОТВРДИЈА дека со договорот Македонците претставуват одделен народ со различен јазик, култура и историја. ПРОТИВНИЦИ на договорот – ДАЛИ ГО ЧИТАТЕ ОВА!!!

  2. Абе Зоран, ти си типичен примерок на поддржувач на ВМРО-ДПМНЕ! Кажи, те молам, КАКВА ВРСКА има тоа за газдите од ЕУ со она што го изјавиле двајцата дипломати за договорот, а тоа е дека МАКЕДОНСКАТА СТРАНА ЈА ЗАШТИТИ МАКЕДОНИСТИЧКАТА ТЕЗА ДЕКА МАКЕДОНЦИТЕ ПРЕТСТАВУВААТ ОДДЕЛЕН НАРОД СО РАЗЛИЧЕН ЈАЗИК, КУЛТУРА И ИСТОРИЈА!!! Тоа што рекле дека Борисов има газди во ЕУ, не ја намалува важноста што со договорот е ПОТВРДЕНО дека сме одделен народ со различен јазик, култура и историја – што значи дека И СО ДОГОВОРОТ сме го СОЧУВАЛЕ НАШИОТ ИДЕНТИТЕТ! Дали го разбираш тоа или треба ДА ТИ НАЦРТАМ???

Comments are closed.