Цуцуловски: Ова досега беше предигра, битното допрва ни претстои

Професорот Љубомир Цуцуловски со своја реакција на „Фејсбук“ по потврдата од македонскиот премиер Зоран Заев дека со неговиот грчки колега Алексис Ципрас договорил ново име за Република Македонија.

„НЕВАЛИДНОСТ И ЦИК-ЦАК ПОЛИТИКА. Веќе 26 години (во континуитет) одбивав да се согласам со било каква промена на уставното име. Според тоа, воопшто не ме интересира што содржи договорот Заев–Ципрас, бидејќи каков и да е, го менува името на Република Македонија. Сепак, од она што беше кажано на прес-конференцијата, која заврши предмалку, впечаток ми остави тврдењето на набожниот (меѓутоа, и побожниот!) Зоран Заев дека со договорот се отворале вратите за македонските граѓани кон светот. Ќе можеле да заминат каде што сакаат и кога ќе посакаат. Јас, пак, мислев дека борбата за Македонија е во создавањето на такви услови, кои нема да ги принудуваат граѓаните да ја напуштаат државата, барајќи работа и живот надвор од неа, бидејќи ефектот на таквата политика ќе биде уште помасовно иселување на младите, кои не се родиле да талкаат по светот, туку да работат и да живеат со своите семејства во земјата во која се родиле. Накусо: „отворањето“ на Македонија кон светот, ќе значи (можеби!) целосно затворање на Македонија.

Сепак, колку и да се сложени состојбите во Македонија, благодарение на десперадорската политика на оваа власт, смирува (барем донекаде) сознанието дека оваа власт е дојдена на власт надвор од кои било законски норми и прописи, и дека, според тоа, сите одлуки, како и сите договори што ќе бидат донесени за време на нејзиното владеење не само што ќе немаат политички легитимитет, туку ќе немаат и политички л е г а л и т е т. Од своја страна, она што е донесено од нелегална власт еден ден ќе биде прогласено за она што навистина е – за н е л е г а л н о. Тоа значи, и за н е в а л и д н о. Меѓутоа, ќе треба да мине многу време и да се направат многу напори невалидното да се прогласи за невалидно, особено ако опозициските партии и понатаму се однесуваат како што се однесуваат – ни ваму, ни таму. Конечно, цик-цак политиката е погубна токму за оние кои ја практикуваат.

Р.Ѕ. Сѐ си мислам дека ова досега беше предигра. Битното допрва ни претстои. Затоа, потребна е поголема ангажираност од било кога досега“, напиша Цуцуловски.

 

SHARE

Comments are closed.