Ги обвини ли Заев за Груевски Тирана, Подгорица, Белград и Будимпешта

Премиерот Заев денеска по грешка или свесно упати осуда за невладење на правото до четирите земји низ кои се движел Никола Груевски за време на бегството.

Тој ги обвини земјите пријатели Албанија, Србија, Црна Гора и Унгарија дека дозволиле Груевски да избега.

Истрагата ќе ги открие деталите за бегството на Груевски, но останува прашањето како четири земји, наши пријатели, тоа го дозволиле, рече Заев, по работната посета на Струмица.

Премиерот очекува јавноста многу брзо да биде информирана што точно се случувало во Македонија околу бегството на поранешниот премиер.

“Јас сум информиран од МВР и знам досега до каде се стигнати работите и верувам дека во многу брзо време на јавноста ќе и бидат соопштени деталите што се случувало во Република Македонија, бидејќи знаеме што се случувало во Албанија, Црна Гора, Србија и во Унгарија.

Останува прашањето како тоа наши пријатели, четири земји, тоа го дозволиле и секако останува прашањето како тоа три земји членки на НАТО, демонстрирајќи владение на правото, го кажувам тоа под наводници, во време кога македонското општество, македонскиот парламент сериозно е фокусиран заради огромната инспирација со право да се биде членка на ЕУ и НАТО, токму тоа се случува.

Но, затоа се истрагите, затоа се информациите коишто следуваат да бидат споделени со јавноста”, изјави Заев.

Сите видовме, заклулува тој, а и потврдија дека со дипломатски возила на Унгарија и придружуван од унгарски дипломати, Груевски стаса во Будимпешта.

Заев жали што МВР 10 дена по бегството не може да излезе со детална информација. Рече и дека го почитува тоа што Јавното обвинителво е во сериозна истрага и додека трае истрагата, повтори, не може да се соопштуваат сите детали.

Премиерот демантираше дека зборувал со Никола Груевски пред да ја напушти државата, додавајќи дека инфомација е веќе демантирана.

“Таман работа, ќе испадне дека заедно тоа сме го договарале. Откога сум премиер, една и пол година, со господинот Груевски немам никакви контакти. Последните контакти беа кога беше заробен, заглавен Парламентот во таа бесконечна дискусија пред да се случат немилите настани на 27 април. Тоа беше таму, во Парламнтот, кога разговаравме да одблокирање на процесот, дека е јасно оти мнозинството постои и да не ја мачиме Македонија и македонските институции. Тогаш беа последните разговори”, рече Заев во изјава дадена за време на денешната посета на Струмица.

SHARE

Оставете Коментар