Коѕијас не дава САД да вршат притисок за името

Америка не врши притисок, туку се интересира за решение кон кое водат преговорите за името и за тоа кои се потешките точки, објави шефот на грчката дипломатија Никос Коѕијас на брифинг со грчките дописници во САД.

Министерот за надворешни работи на Грција вчера се сретна со советникот за национална безбедност на американскиот претседател, Џон Болтон, а состанокот траел двојно повеќе од предвиденото. И Болтон и државниот секретар Мајк Помпео, како што рече Коѕијас, ги слушнале грчките позиции како за регионот и за Блискиот исток, така и за односите на Грција со Турција и за разговорите за името, за кои разговарал со помошниот државен секретар Вес Мичел.

„Во скопското прашање немаме никаков притисок, ниту некој има намера да нè притиска. Никогаш нема да дозволиме да нѐ притискаат. Но, многу се интересираат за решение и се обидуваат да разберат каде се наоѓаат преговорите и кои се тешките точки“, рече Коѕијас и додаде дека искуството покажало оти кога се преземаат иницијативи, тогаш никој не може да се меша.

Тој потенцира дека во однос на Скопје е во континуирана консултација и соработка со грчкиот премиер Алексис Ципрас, со кој имаат совпаѓање на ставовите.

Шефот на грчката дипломатија рече дека паралелно со главните преговори, ќе одржат состанок техничките групи, а ги спомена и двата текста, едниот од грчка страна, другиот од медијаторот, кои ги содржат точките за кои што се водат преговорите.

„Да знаете дека имаме напишано голем текст, Грција го направи. Овој текст, заедно со правниот текст направен од Нимиц, ги презедовме и ги интегриравме во еден текст, во кој вториот дел се однесува на идната соработка на Грција и ПЈРМ, односно перспективата во прашањата за образованието, истражувањата итн. Првиот дел се однесува на прашања што се поврзуваат со името, пред сѐ со прашањата за иредентизмот, со кои треба да завршиме, како и поглавјето за признавање на сите меѓународни правни реалности, границите, неповредливоста на границите, дека од ниедна страна не може да се води пропаганда или да се дава простор за пропаганда од едната против другата страна итн.“, рече Коѕијас од САД во брифингот за грчките новинари.

 

SHARE

Comments are closed.