Македонци од САД бараат враќање на знамето со сонцето од Кутлеш

Лига на Македонци Американци (ЛОМА) ги повикува сонародниците повторно да го користат претходното знаме на Република Македонија со сонцето од Кутлеш наместо „наметнатото“ што е во употреба сега.

„Македонци, престанете да го употребувате знамето што ни го наметнаа Грција и ЕУ. Користењето на тоа знаме е признавање на БЈРМ и на позицијата на Грција. Ако сме против промена на името, против сме и наметнати знамиња исто така. Нема повеќе знаме на БЈРМ, вратете го вистинското македонско знаме! #лажно знаме“, напиша ЛОМА на својот профил на „Твитер“.

Во рамките на постот под знамето со сонцето од Кутлеш пишува: „Вистинско македонско знаме. Беше напуштено само поради тврдењата на Грција дека тоа е нејзино заедно со името Македонија. Ако ние сме вистински Македонци, тогаш треба да го користиме само македонското знаме“.

Под сегашното државно знаме, пак, стои: „Познато како ‘модерно’ македонско знаме. Беше усвоено кога Македонија се согласи да виде етикетирана како БЈРМ. Грција ни се закани за нашето име и знаме, па го сменивме. Ова знаме повеќе грчко отколку македонско и ги симболизира грчката агресија и расизам. Ова знаме не треба никогаш да се вее од вистински Македонец“.

Првото државно знаме на самостојна Република Македонија, 16-кракото сонце од Кутлеш, беше во официјална употреба до 5 октомври 1995 година, кога беше заменето со креацијата на професорот Мирослав Грчев.

 

SHARE

Comments are closed.