Глобалното движење „Ние сме Македонија“ со пригодно видео ги потсетува политичките фактори во татковината, како и Македонците каде и да се, дека борбата за одбрана на името на државата, на идентитетот и на јазикот е сè уште активна.

Во пресрет на најавената средба на премиерите на Македонија и на Грција, Зоран Заев и Алексис Ципрас, на маргините од самитот „Европска унија – Западен Балкан“ на 17 мај во Софија од Движењето порачуваат дека се против промена на уставното име Република Македонија, сметајќи дека таа би имала штетни последици и врз идентитетот и јазикот на македонскиот народ.

Видеото претставува пресек на 40 протести во Македонија и во дијаспората од февруари наваму, на кои над 150.000 Македонци и пријатели на Македонија јасно и гласно ѝ упатија порака на сегашната власт дека никој не ја овластил да преговара за најсветото.

„Преку 150.000 Македонци и пријатели на Македонија се обединија глобално за една кауза – Македонија. Преку макотрпната работа на илјадници патриоти, со љубовта кон татковината, заедно, обединети под транспарентот #НиеСмеМакедонија, народот се крена да каже СТОП за сите преговори веднаш!

Ниту една друга држава во 21. век не е принудена да преговара за своето име, идентитет, јазик и државност за да задоволи некој друг. Името на Македонија е наша работа!“, стои во прогласот на Движењето, кое им се заблагодарува на сите што зедоа учество во семакедонските собири во Македонија, како и во Торонто, Едмонтон и Калгари во Канада, Детроит, Чикаго, Вашингтон, Њујорк и Лос Анџелес во САД, Мелбурн, Сиднеј, Перт, Бризбејн и Аделејд во Австралија, Оукленд во Нов Зеланд, како и во Израел, Малта, Хрватска, Словенија, Италија, Шведска, Данска, Германија, Франција, Велика Британија, Швајцарија, Чешка, Австрија и Норвешка.

„Им благодариме на сите што помогнаа да се рашират информациите преку интернет на социјалните мрежи, преку своите пријатели, роднини и соседи. Секој поединец ја разбира обврската кон татковината и борбата за нашите права ќе продолжи. #ДостаБеше #НиеСмеМакедонија #ЗаедноМожеме“, порачуваат од „Ние сме Македонија“.

 

1 Коментар

  1. Нимиц веќе разбира дека ваков проблем со идентитетот и Уставот НЕМА решение, ниту сега, ниту во иднина! Спор за идентитетот на една држава или еден народ НЕ постои, ниту има или може да се бара решение за ваков беспредметен спор или тнр. „разлика”! Сега Нимиц очајнички сака да направи решение, таму каде што не може да има решение!

Comments are closed.