Само RULE OF LAW води кон ЕУ!! – Силјановска со лекција за Османи

Пишува Проф.Др. Гордана Силјановска Давкова
Професор по уставно право

Г-дин Бујар Османи , како прв човек на евроинтеграциите, треба да му покаже и докаже на г-дин Хан дека Homo Balcanicus e Homo Europicus! Како? Со посветеност и ПОТЧИНЕТОСТ на Rule of Law. Лошо е кога лекар, во улога на правник-аматер, лаички посега по уставни импровизации . Нека и ја остави правната интерпретација на министерката за правда, зошто вака звучи како Насредин Оџа.

„Правната“ аналогија дека, ако Претседателот се избира со праг од 40 % излезност, зошто и референдумот не би бил успешен со истиот процент, е правна небулоза! Ако веќе сакал да манифестира правна култура и талент за „креативно“ читање на Уставот пред г-дин Хан, требало ВНИМАТЕЛНО да го прочита член 81, став (2) , (3) и (5) од Уставот, а не само Амандманот XXXI.

Имено, во член 81, став (2) пишува: За претседател на Републиката е избран кандидатот кој добил МНОЗИНСТВО ГЛАСОВИ ОД ВКУПНИОТ БРОЈ ИЗБИРАЧИ. Во ставот (3) пак, се вели дека: „Ако во првиот круг ниту еден кандидат за претседател не го добил потребното мнозинство гласови, во вториот круг се гласа за двајцата кандидати кои во првиот круг добиле најмногу гласови“.

Ставот (5) пропишува:

„ За претседател е избран кандидатот кој добил мнозинство гласови од избирачите кои гласале, доколку гласале повеќе од половината избирачи“.
Со Амандманот XXXI се измени ставот (5) на Член 81 во оваа смисла: „ За претседател е избран кандидатот кој добил мнозинство гласови од избирачите кои гласале , доколку гласале повеќе од 40% од избирачите!!

Исто така, требал, НЕКОЛКУ ПАТИ да го ПРЕПРОЧИТА членот 73, став 2 од Уставот: „ Одлуката на референдумот е усвоена, ако за неа гласало МНОЗИНСТВОТО ОД ИЗБИРАЧИТЕ КОИ ГЛАСАЛЕ; доколку гласале ПОВЕЌЕ од ПОЛОВИНАТА!! Потем, МОРАЛ да се го задржи погледот на став (4) на член 73: „ ОДЛУКАТА ДОНЕСЕНА НА РЕФЕРЕНДУМОТ Е ЗАДОЛЖИТЕЛНА“.

Откако ќе си го запишел прочитаното, можел, како ЉУБОПИТЕН лекар – министер за евроинтеграции, ВНИМАТЕЛНО да се усредсреди на членот 120, став (2) и (3). Имено, во став (2) се вели дека: „ Одлуката за стапување и истапување од сојуз или заедница со други држави ја донесува Собранието со 2/3 мнозинство гласови од вкупниот број пратеници, а ставот (3) гласи: „ Одлуката за стапување и истапување од сојуз со други држави е усвоена ако за неа гласало мнозинството од вкупниот број избирачи“.

Значи, во процесот на евроинтергацијата, не смее да заборави дека RULE OF LAW e АРМИРАНИОТ БЕТОН на ЕУ!! Мора да стави барем едно камче во македонското разрушено ВЛАДЕЕЊЕ на правото. Ама, ако од 2001 година неговата партија е на власт, тешко е да веруваме во нејзините и неговите НЕИМАРСКИ намери и способности!!
Гордана Сиљановска- Давкова

Поврзана вест

Ако може претседател со 40% цензус, може и референдум, вели Османи

SHARE

Comments are closed.