Косовскиот весник „Зери“ смета дека во најновата балканска држава има далеку помалку граѓани отколку што тврдат тамошните власти. „Напумпаниот“ број на избирачи е последица на неажурирање на Избирачкиот список од 1999 година, тврди весникот.
Право на глас на претстојните избори за членови на косовското Собранмие, според податоците на Централната изборна комисија, имаат 1,9 милиони регистрирани избирачи, иако во Косово официјално живеат само 1,7 милиони жители, пишува денеска приштинскиот весник „Зери“.
Според Митахер Хаскука од опозициското националистичко движење Самоопределување, кога ќе се спореди бројот на жителите и бројот на лицата помлади од 18 години, кои немаат право на глас, Косово не би требало да има повеќе од 1,2 милиони избирачи.
„Зери“ смета дека „пренапумпаниот“ број на избирачи е последица на неажурирање на Избирачкиот список од 1999 година, што во минатото ја отворало можноста за изборни кражби.
Сепак, претседателката на Централната изборна комисија, Ваљдете Дака тврди за „Зери“ дека списокот е ажуриран и оти во бројот на лицата со право на глас се вклучени и оние кои живеат во странство.
Предвремени парламентарни избори на Косово ќе се одржат на 11 јуни. На барање на опозицијата, Собранието на Косово минатата недела и изгласа недоверба на Владата на премиерот Иса Мустафа, кој е лидер на Демократскиот сојуз на Косово, а одлучувачки при изјаснувањето беа гласовите на неговиот коалициски партнер, Демократската партија на Косово, на досегашниот претседател на Собранието Кадри Весели.
Предходно и медиуми во Албанија тврдеа дека наместо 3 милиони граѓани на оваа земја колку што тврдат властите во Тирана реално живеат не повеќе од 2,2 милиони. Намалувањето на бројот на граѓани се должи пред се на имиграцијата. Само лани од Косово во ЕУ се иселени над 100 илјади луѓе.
