„Започна со работа новата хала на компанијата ‘Амфенол’ во Кочани. Инвестицијата на компанијата е трудоинтензивна, со близу 3.200 вработени. Во план се и 500 вработувања, кои ќе се реализираат во две фази: кога ќе биде завршен објектот ќе има нови 300 вработени, а догодина се планира нови 200. Така ќе се заокружи бројката од 3.700 вработени.“ – изјави претседателот на Владата на Република Македонија Христијан Мицкоски од Кочани, каде што се наоѓа фабриката „Амфенол“.
Според премиерот Мицкоски, станува збор за исклучително висока технологија, со голема вредност на производот, што е важно, бидејќи ќе влијае врз бруто-домашниот производ на Македонија. „Како Влада поддржуваме директни инвестиции, домашни и странски. Преку програмата ќе ги поддржиме овие нови инвестиции на компанијатa ‘Амфенол’ тука во Кочани. Но во иднина планираме и во одредени други градови да се прошири инвестицијата на ‘Амфенол’. Оваа компанија е за нас стратегиски партнер.“ – напомна Христијан Мицкоски.
Тој информира дека приходите оваа година ќе изнесуваат околу 200 милиони евра. „Тоа е огромна бројка. Придонесува не само за локалната економија, туку и генерално за државната економија. Како Влада со оваа посета и со овој увид сакаме да испратиме порака оттука дека сме партнери со бизнис-заедницата, со инвеститорите, без разлика дали се тоа домашни и странски.“ – посочи премиерот Мицкоски.
Тој укажа дека во Советот на странски инвеститори се разговара отворено за проблемите. „Голем дел од проблемите се решаваат, меѓу нив се и усогласувањата на царинските ставки, кои што започнаа да се применуваат од 1 јули оваа година. Ако ја заокружиме перспективата овде и перспективата во Македонија, тогаш можам да кажам дека не се случајни се оние показатели, што ги имавме во економијата во првиот квартал оваа година. Веќе имаме три последователни квартали годинава со раст над 3 проценти, што претставува еден од водечките резултати според растот на бруто домашниот производ на државата во Европа. Ова е втор квартал што измина, а којшто треба наскоро да се објават податоците. Очекуваме исто така голем раст.“ – подвлече премиерот Мицкоски.
„Како Влада продолжуваме да создаваме добра бизнис-клима, стабилност, за да имаме добри работни места, колку е можно повеќе работни места, а оние што ја напуштија Македонија да ги вратиме дома. Владата сака да биде пријател на бизнисот и така и ќе продолжи да се однесува.“ – заклучи претседателот на Владата на Македнија Христијан Мицкоски.