Акционерите на „Тесла“ го одобрија рекордниот пакет плати за извршниот директор Елон Маск, кој, доколку се исполнат сите амбициозни цели, би можел да достигне вредност од речиси еден билион долари – најголемиот бонус во корпоративната историја.
Одлуката беше донесена со поддршка од 75 проценти од гласовите на акционерите на годишниот состанок на компанијата во Остин, Тексас, придружена со стоечки овации, музика и скандирања на публиката. Маск, кој веќе е најбог човек на светот со нето-имот од околу 473 милијарди долари, славеше на сцената заедно со два хуманоидни робота.
„Она што го започнуваме не е само ново поглавје, туку цела нова книга за иднината на ‘Тесла’“, рече Маск.
„Другите состаноци на акционерите се приспивни песни, а нашите се спектакл“, додаде тој, нагласувајќи го преминирањето на компанијата кон ера на вештачка интелигенција и роботика.
Пакетот не вклучува стандардна плата, туку е целосно врзан за постигнување на високи цели: зголемување на пазарната капитализација на „Тесла“ од 1,4 на 8,5 билиони долари, воведување на милион роботакси во комерцијална употреба, продажба на милион хуманоидни роботи Оптимус и низа други технолошки и финансиски пресвртници во следните десет години. Ако се остварат, Маск би добил 423,7 милиони нови акции, што би претставувало дополнителни 12 проценти од компанијата и би го направило првиот трилионер на светот.
Менаџментот на „Тесла“ ја бранеше одлуката, тврдејќи дека без таков поттик, Маск би можел да ја напушти компанијата – сценарио што „немаме можност да си го дозволиме“. Претседателката на одборот, Робин Денхолм, предупреди дека Маск не добивал значајна компензација од осум години поради правни спорови околу претходниот пакет од 2018 година, кој беше поништен од суд во Делавер, но сега е обновен.
Разочарувачки за некои аналитичари беше фокусот на Маск врз хуманоидниот робот Оптимус во говорот, наместо врз оживувањето на продажбата на електрични возила, чии профити во третиот квартал на 2025 година паднаа за 9 проценти на 4,2 милијарди долари.
„Погледнете каде е неговиот фокус“, напиша Џин Манстер од Deepwater Asset Management на платформата X.
„Неговата ‘нова книга’ започнува со Оптимус. Нема ниту збор за автомобили, FSD или роботски такси“.
Подоцна, Маск се осврна на автономниот систем за возење Full Self-Driving (FSD), тврдејќи дека „Тесла“ е „скоро подготвена“ да им дозволи на возачите „буквално да испраќаат пораки додека автомобилот сам вози“. Американските регулатори, меѓутоа, сè уште ја истражуваат технологијата поради серија инциденти во кои возила на „Тесла“ поминале на црвено светло или влегле во погрешна лента, предизвикувајќи повреди.
Одлуката, и покрај опозицијата од големи инвеститори како Норвешкиот суверен фонд и советодавните фирми Glass Lewis и Institutional Shareholder Services, ја потврдува довербата на акционерите во визијата на Маск за трансформација на „Тесла“ во лидер во ИИ и роботика, но и ја отвора дебатата за ризиците од разводнување на акциите и потенцијалниот одлив на талент.