Пратеничката на ВМРО-ДПМНЕ Иванка Василевска која е член на Парламентарното Собрание на Советот на Европа вечерва објави дека е затворен пост-мониторинг дијалогот со Македонија.
,,Одлична вест за Македонија!
Почитувани сограѓани, Ви се обраќам од срцето на демократијата, од местото каде заштитата на човековите права и слободи, поттикнувањето на демократските вредности и дијалогот помеѓу нациите се на пиедесталот на вредностите на современата цивилизација.
Голем поздрав од Советот на Европа во Стразбур.
Со огромно задоволство ја имам честа да ви соопштам многу важна вест. На попладневното заседание на зимската пленарна сесија, вечерва, ја изгласавме Резолуцијата за затворање на пост-мониторинг дијалогот за нашата држава. Ова е голем успех за Македонија, успех кој го следи 25 години напорна работа и истрајност на патот кон развиените демократски вредности, владеењето на правото и човековите права!
Текстот на Резолуцијата во име на Мониторинг комисијата беше изготвен од известителите Сибел Арслан од Швајцарија од политичката група на Социјалистите и Џозеф О’Рајли од Ирска од Европските народни партии.
Со овој чин, Парламентарното собрание на Советот на Европа го признава одржливиот напредок на македонската држава во демократијата, владеењето на правото, заштитата на човековите права и соработката со телата на Советот на Европа и истовремено ја признава политичката посветеност на властите за исполнување на обврските преземени при отворањето на пост-мониторинг дијалогот во 2000 година. Имајќи го сето ова во предвид, пратениците на Парламентарното Собрание одлучија да го затворат пост-мониторинг дијалогот и да продолжат да ги следат случувањата во земјата преку својот механизам за редовен периодичен преглед.
Сакам да истакнам дека значењето на мониторинг процесот е нагласен и во односите меѓу Советот на Европа и Европската Унија. Постои координиран пристап во мониторинг механизмите на Советот на Европа, односно Парламентарното собрание со ЕУ и другите меѓународни организации. Поради оваа блиска соработка, консултација и координација на активностите во рамките на проширувањето на ЕУ, исполнувањето на обврските и заложбите кон Советот на Европа се сметаат за битен елемент за унапредување, забрзување и остварување на аспирациите за натамошно евроинтегрирање на одредена држава.
Од таа причина, затворањето на ова поглавје претставува чин на највисока потврда за исполнувањето на обврските за одржување на највисоките демократски стандарди и стандардите за човековите права во Република Македонија.
Дозволете ми да споменам дека во овој процес во текот на изминатите 25 години учествуваа сите политички фактори, а во последната година и половина од формирањето на новата Влада, предводена од премиерот Христијан Мицкоски значаен е придонесот и на моите колеги Марија Петрушевска, Бисера Костадиновска Стојчевска и Беким Ќоку, како и на амбасадорката на постојаната мисија при Советот на Европа, Н.Е. г-ѓа Светлана Гелева.
Верувам дека со затворањето на пост-мониторинг процесот, овој постигнат напредок ќе има позитивно влијание и врз нашите евроинтеграции”, објави Иванка Василевска.