„Лидерот на Алијансата за Албанците Арбен Таравари го претстави првиот столб на новата политичка платформа на оваа партија – заштитата на албанскиот национален идентитет. Тој ги повика сите Албанци во С.Македонија, без оглед на партиската или политичката припадност, да се обединат околу оваа кауза.“ – објави информативниот портал на албански јазик „Инфошќип“.
Натаму порталот наведува: „Заштитата на идентитетот не е само политичко прашање – тоа е национална должност и одговорност.“ – нагласи Таравари.
Тој претстави четири конкретни столба на ангажирањето на партијата во овој поглед: „(1) вистинско и бескомпромисно спроведување на албанскиот јазик како службен јазик во сите државни институции и јавната администрација; (2) зачувување на традиционалните албански имиња на населбите, улиците и институциите, како неразделен дел од албанскиот национален идентитет; (3) активна заштита на албанското културно наследство, преку реставрација и зачувување на предмети од историско и културно значење и (4) зајакнување на традиционалните албански семејни и морални вредности како основа на општественото единство и националната стабилност на Албанците.“
„Само преку единство и посветеност можеме да постигнеме вистинска еднаквост и достојна застапеност во С.Македонија.“ – изјави лидерот на АА Таравари. Според него, овие принципи го сочинуваат „темелот на новата национална визија на Алијансата за Албанците“, со цел „градење поправедна и пообединета иднина за Албанците во земјата“. – објави „Инфошќип.