„Координаторот на пратеничката група на ВМРО-ДПМНЕ Никола Мицевски на денешната прес-конференција обвини дека радикални маргинални структури се обидуваат повторно да предизвикаат вештачки конфликти со симболите на државноста и борбата.“ – објави информативната агенција „Нетпрес“.
Натаму агенцијата наведува: „Последниот срамен обид на Левица, да поднесе закон за забрана на името ВМРО не е ништо друго освен директна нарачка од круговите, што со децении работат против македонскиот идентитет.“ – вели Мицевски.
Според него, ова е истата таа агенда што со години се промовира од политички и академски структури и центри во Бугарија:
– Македонија да се откаже од своето револуционерно минато.
– ВМРО да се претстави како „контроверзен“, или „непосакуван“ дел од историјата.
– Македонскиот народ да се откорне од своите херојски настани.
„Сега, истата таа агенда добива домашни извршители во форма на пратениците на Левица. Ова не е првпат да се случува. Во 2018 година имаше обид, со поддршка од тогашната власт на СДСМ, ДУИ и Специјалното јавно обвинителство (СЈО) како инструмент, да се укине ВМРО и да се измени законот. Тие обиди беа спречени благодарение на поддршката од пријателски држави и сестрински партии. Тогашната агенда беше разобличена.“ – посочува координаторот на пратеничката група на ВМРО-ДПМНЕ Мицевски.
Тој смета дека суштината на ова сценарио е фактот, што истата таа улога ја презема Димитар Апасиев, тогаш советник во СЈО, денес лидер на Левица. Според Мицевски, денес Апасиев е заслепен од сопствената ароганција и сам си ја потврдува улогата: дека е најобична алатка во туѓи раце.
„Алатка што кога нема да им користи, ќе ја заменат со нова. Но, ВМРО е повеќе од име. ВМРО е борба, истрајност, отпор и иднина. Затоа, како државотворна партија ВМРО-ДПМНЕ ќе ги заштити името, симболот и суштината на македонската борба за слобода. Ниеден обид за бришење на историјата нема да помине. Повторно ќе се види кој стои на браникот на Македонија, а кој, како испостава на туѓи интереси – работи против сопствениот народ. Историјата не може да се избрише со закон. ВМРО ДПМНЕ ќе продолжи посилно и порешително од кога било досега.“ – категоричен е Мицевски.