„Потпретседателот на ДУИ и поранешен министер за надворешни работи на С.Македонија Бујар Османи во емисијата ‘На секој агол’ на ТВ А2 ЦНН од Албанија зборуваше за најновите политички случувања во неговата земја и подготовките за локалните избори, Според него, овие избори се сметаат како референдум, бидејќи, како што изјави, ‘со месеци веќе постои стратегија за исклучување на Албанците’.“ – пренесе информативната агенција на албански јазик Илирија-ИНА од Македонија.
Агенцијата наведува: „Османи вели дека и премиерот Мицкоски користи неприфатливи тонови кон него, велејќи како е можно Албанец да преговарал со Бугарија за идентитетот на државата.“
Потоа ја цитира изјавата, која ја даде Бујар Османи за А2 ЦНН од Албанија во овој контекст: „Би сакал овие избори да бидат локални, но тие се претворија во референдум: дали Албанците ќе се покорат, или ќе им се вратат на принципите на Охридскиот договор. Овие принципи нè дефинираа како господари во нашата земја. Постои стратегија на исклучување на Албанците, за да се чувствуваат како кираџии во сопствената куќа. Премиерот зборува конкретно за мене и вели како може Албанец да одлучува за идентитетот на државата, да преговара со Бугарија, како да сум јас граѓанин од втор ред дури и кога сум министер за надворешни работи. Иако ве избира Парламентот, вие немате право да преговарате во име на државата. Ова предизвика Албанците да се чувствуваат исклучени и потценети.“