Во овие моменти активен е голем пожар на планината Жеден кај тетовското село Желино. Според неофицијални информации, пожарот е намерно подметнат од поединци, кои запалиле гуми и ги пуштиле да се тркалаат низ планината. Потоа се запалиле и зимзелени дрвја, грмушки и друга вегетација. Огнот зафати десетици хектари нискостеблеста шума и сува вегетација. Во гаснењето дејствуваат тетовските пожарникари, полициски камион МАН со цистерна од 8 тони и воден топ, 2 теренски возила пинцгауер, 1 хермелин, хеликоптер и 30 припадници на Армијата на Република Македонија, екипи од Скопската бригада за противпожарна заштита и авионите ер-трактори на ДЗС за воздушна поддршка.
Но пожарот продолжува брзо да се шири и натаму, поради ветрот. Претставува голема закана за населението во Желино, но и за учесниците во сообраќајот, кој се одвива во непосредна близина на пожарот. Полицијата има информации за лицата кои го подметнале пожарот и трага по нив. „Нашите сознанија и информациите од противпожарните единици од пожарникарите, што беа овде, се дека се најдени запалени 3 гуми. Тоа докажува дека човек го предизвикал овој пожар.“ – изјави Блерим Сејдиу, градоначалник на Желино.
Пожари денес се гаснеа на уште пет други места во Македонија. Надлежните информираа дека три од нив се под контрола, а исто толку до 14 часот беа целосно изгаснати.