Еден од најсовремените патнички авиони, Ербас А350, за првпат слета на Меѓународниот Аеродром Скопје. Како што соопштија од аеродромот, авионот пристигна на редовната утринска линија на „Туркиш Ерлајнс“, пренесе СДК.мк. Оттаму додаваат дека ова слетување на има и симболичен почеток, бидејќи меѓу патниците имаше и млади спортисти и делегации кои ќе учествуваат на Европскиот младински олимписки фестивал „Скопје 2025“.
Попладнево на аеродромот слета уште еден широкотрупен авион на етиопската компанија „Етиопијан“, од типот „боинг 787 – дримлајнер“, со капацитет од 270 седишта кој довезе спортисти од Париз.
Широкотрупниот авион на „Туркиш ерлајнс“ , кој вообичаено се користи за долги прекуокеански летови, што слета во Скопје, има капацитет од 32 седишта во бизнис класа и 297 во економска класа. Најавено е дека истиот тип на авион повторно ќе лета помеѓу Истанбул и Скопје на 27 јули.
Иако Меѓународниот Аеродром Скопје не е типично опремен за прием на најголемите „џамбоџет“ авиони како што се „ербас“ А350 , „ербас“ А330, или „боинзите“ 787 и 747 поради должината на пистата и инфраструктурата, ова не е првпат големи летала да слетуваат тука. За време на косовската криза во 1999 година, на аеродромот слетуваа воени транспортни авиони Ц-5 Галакси на американското воено воздухопловство. Исто така, во мај истата година, широкотрупни авиони од типот Боинг 747, изнајмени од Меѓународната организација за миграција (ИОМ), беа користени за транспорт на косовските бегалци во САД, превезувајќи по околу 450 патници на лет, Исто така, воениот авион Ц-17 е чест посетител на скопската писта, кој се користи за транспорт на персонал и возила за време на вежбите на НАТО и Армијата на САД. На Скопскиот аеродром во сабота (19 јули) беше забележан зголемен обем на сообраќај бидејќи поради младинскиот олимписки фестивал слетаа уште десетина авиони на вонредни линии. Европскиот младински фестивал почнува на 20 јули и во Скопје ќе се натпреваруваат 4.000 спортисти од 50 држави.
