„Договорот за стратегиско партнерство со Велика Британија отвора нови перспективи за остварливи проекти, кои директно ќе влијаат врз секојдневието на луѓето: брза железница, нови здравствени установи, подобри комуникации и технолошка инфраструктура.“ – изјави меѓу другото министерот за надворешни работи и надворешна трговија на Република Македонија Тимчо Муцунски во видео, објавено на неговите профили на општествените мрежи, во кое гобори за конкретната корист од тој договор.
„Зборовите не се доволни. Се бројат резултатите: работа, развој, подобар живот.” – истакнува Муцунски.
Тој нагласи дека не ветуваат, туку оти реализираат. Укажува дека основната цел е младите да останат во државата, да се создадат нови можности за инвеститорите, а граѓаните да добијат повисок стандард на живеење.
„Ова не е политика – ова е работа за иднината“ – порача министерот за надворешни работи на Република Македонија Тимчо Муцунски.
Министерството за надворешни работи и надворешна трговија на Република Македонија информираше дека во рамките на минатонеделната посета на Лондон министерот Муцунски и неговиот британски колега државниот секретар за надворешни работи, развој и Комонвелт Дејвид Лами ја потпишаа Декларацијата за стратегиско партнерство меѓу Република Македонија и Велика Британија.
„Овој документ има за цел да ги зацврсти заемните стратегиски односи меѓу двете земји, вклучително и соработката во областа на надворешната политика, безбедноста и одбраната – особено во рамките на НАТО, правдата и внатрешните работи, борбата против тешкиот и организираниот криминал, справувањето со корупцијата и незаконските финансиски текови, како и економскиот раст.” – се додава во соопштението на Министерството за надворешни работи и надворешна трговија на Република Македонија.