Основното јавно обвинителство од Куманово започна предистражна постапка и му наложи на Секторот за внатрешни работи да испита можни елементи на кривично дело поврзано со говор на омраза, откако за време на натпреварот меѓу Македонија и Романија биле забележани скандирања со навредлива и омаловажувачка содржина од засега непознати лица.
„Основното јавно обвинителство Куманово постапува и до СВР Куманово издаде повеќе наредби и насоки за испитување елементи на кривично дело при скандирањата, кои содржеа говор на омраза од засега непознати лица на вчерашниот кошаркарски натпревар меѓу репрезентациите на Македонија и Романија.“ – соопшти ова обвинителство.
Како што информираат од обвинителството, издадена е наредба да се прибават видеоснимки од надзорните камери за полесно идентификување на вмешаните лица. Настанот се случил на 2 август во спортската сала во Куманово, кога двете репрезентации одиграа натпревар од квалификациите за Светското првенство во кошарка 2027. Натпреварот, во кој македонската селекција беше поразена со 72:80, го означи и повторното отворање на реконструираната спортска сала во Куманово.
Осуда за непримерното скандирање на поединци на кошаркарскиот натпревар изразија политичките партии од власта и од опозицијата, од Општина Куманово и од раководството на Македонската кошаркарска федерација.