Историчарот Бранислав Светозаревиќ укажа на уште еден момент од примопредавањето историски артефакти меѓу Бугарија и Грција.
„ВНИМАВАЈТЕ! Еве дел од предадените скапоцени реликвии од страна на некои охриѓани на бугарските власти во 1916 год. Под бр. 10 е и сребрената реликвија со моштите на Св. Матрона, која пред некој ден Бугарија ѝ ја подари на Грција во замена за коските од непознат човек. Но, ВНИМАВАЈТЕ! Отстапени се на привремено чување. Сега македонската влада има право да ги бара назад сите предмети“, напиша тој на Фејсбук во прилог на списокот со 19 црковни предмети дадени во 1916 година на „привремено чување“ во Софија, меѓу кои и кивотот со моштите на Света Матрона.
„Денес, 28 ноември 1916 година, врз основа на телеграма на претседателот на Владата г. д-р Радославов од 21. овој месец под број 17762, составен е овој акт за собраните, спакуваните и испратените на привремено чување во Софија долуозначените црковни старини, сопственост на градот Охрид“, се вели во почетокот од листата на артефактите.
Сребрената кутија со моштите на Света Матрона е оригинален црковен артефакт од 1798 година, кој потекнува од црквата „Богородица Перивлепта“ во Охрид.
За време на Првата светска војна, во ноември 1916 година, реликвијата заедно со други вредности од охридските цркви е однесена од Охрид во Софија на „привремено чување“ и со децении се чувала во Националниот историски музеј во Софија, пред да ѝ биде дадена на Грција како дел од замената во која Бугарија ги доби наводните коски на Цар Самоил.
