„Слава за хероите од Карпалак. Нвното дело и пожртвуваност се паметат, нивната храброст и решителност се почитуваат. Нека биде нивната жртва аманет за идните поколенија дека се свети слободата, мирот и достоинството.“ – нагласи претседателот на Владата на Република Македонија Христијан Мицкоски во објавата на општествените мрежи по повод денешното одбележување на 24-годишнината од терористичкиот напад врз конвојот на Армијата на Република Македонија на 8 август во 2001 година кај месноста Карпалак, на патот Скопје – Тетово. Тогаш животите ги загубија десет резервисти на АРМ: Сашо Китаноски, Нане Наумоски, Бранко Секулоски, Марко Деспотоски, Ердован Шабаноски, Љубе Грујоски, Дарко Вељаноски, Веби Рушитоски, Горан Миноски и Пеце Секулоски.
Натаму Мицкоски истакнува: Карпалак го паметиме како наша обврска да изградиме држава, во која нема да има место за омраза, за поделби, за неправди и кадешто е неприкосновена слободата на нашата татковина.
Македонија никогаш нема да ве заборави! Карпалак е рана, но и аманет. – пишува македонскиот премиер Мицкоски во објавата на опшествените мрежи.