Баздникин: Русија е за соработка за каква што е подготвена македонската страна

Рускиот амбасадор во Македонија, Сергеј Баздникин, уште еднаш го повтори ставот на својата земја дека не се меша во внатрешните работи на Македонија, нарекувајќи ја така, а не со новото име.

„Високо го цениме дијалогот со македонските партнери. За разлика од повеќето наши западни колеги, ние не се мешаме во внатрешните работи на Македонија. Така ќе биде и понатаму. Подготвени сме за унапредување на заемно полезната и рамноправна соработка – толку активна и интензивна колку за тоа ќе биде подготвена самата македонска страна“, рече Баздникин во своето обраќање на одбележувањето на Денот на бранителите на татковината во Скопје.

„Не сме заинтересирани за дестабилизација на меѓународната ситуација, не посакуваме нејзина ескалација, ниту конфронтација со некого. Меѓутоа, неодговорни постапки на тие што не сакаат да ја прифатат реалноста на новиот полицентричен модел на светскиот поредок кој во моментов се формира создаваат нови ризици и предизвици. Во овие услови, обезбедувањето на силна безбедност на нашата земја и на нејзините граѓани, заштитата на нашите национални интереси останува непроменлив и безусловен приоритет. Треба да се знае дека Русија никому не му се заканува, а сите наши дејствија во сферата на безбедноста се исклучиво реципрочни, што значи – одбранбени“, истакна првиот човек на амбасадата што сè уште го користи името Република Македонија во својот опис.

SHARE

Оставете коментар