Македонија треба забрзано да ги зголемува капацитетите за складирање електрична енергија преку инсталирање повеќе батериски системи, со што ќе може да ја складира струјата во периодите кога е евтина, а да ја користи или извезува во часовите кога цените се повисоки. На тој начин земјата може подобро да го искористи сопственото производство на електрична енергија, но и можностите што ги нуди регионалниот пазар.
Ова го истакнува проф. д-р Кочо Анѓушев, сопственик на ФЕРОИНВЕСТ и претседател на Македонската енергетска асоцијација, во одговор на прашања на Bloomberg Adria за развојот и перспективите на батериските системи во Македонија.
Како пример Анѓушев ја посочува Бугарија, која во изминатиот период значително ги зголеми капацитетите за складирање електрична енергија. Батериските системи ѝ овозможуваат во дневните часови, кога електричната енергија е евтина, да купува струја од соседните земји, да ја складира, а во вечерните часови да ја продава по повисоки цени.
„Бугарија многу добро постапи во тој дел и има сериозни финансиски бенефити. Македонија може истото да го направи, треба да ја види оваа шанса, да не ја испушти и брзо да направи интервенција во овој дел“, вели проф.д-р Анѓушев.
Потребата од батериски системи дополнително се зголемува со растот на производството од фотоволтаични електрани. Во часовите кога тие произведуваат најмногу електрична енергија, на пазарот има големи вишоци и цените се ниски. Наместо електричната енергија да се продава во тој момент по ниска цена, батериските системи овозможуваат таа да се складира и да се пласира подоцна, кога побарувачката и цените се повисоки.
Според Анѓушев, користа од батериските системи не е само за инвеститорите во обновливи извори. Државата исто така има значаен интерес од нивното побрзо инсталирање, бидејќи батериите придонесуваат за подобро балансирање на електроенергетскиот систем и ги намалуваат трошоците што произлегуваат од потребата за негово балансирање, одговара Анѓушев на прашањата на Bloomberg Adria.
Воедно, складирањето овозможува подобро искористување на електричната енергија произведена во земјата. Наместо вишоците да се продаваат во периоди на ниски цени, а подоцна, кога струјата е скапа, да се увезува електрична енергија, дел од домашното производство може да се складира и да се користи кога е најпотребно или да се извезува кога пазарните услови се поповолни.
Еден од главните проблеми што во моментов го забавуваат инвестирањето во батериски системи, според Анѓушев, се административните процедури, кои траат најмалку една година, а во одредени случаи и година и половина.
Тој го оценува како позитивно решението батериските системи што се поставуваат кај постојните фотоволтаични електрани да се третираат како опрема за која не е потребно одобрение за градба, но посочува дека обврската проектите да бидат вклучени во годишниот енергетски план сепак ја продолжува постапката.
Македонската енергетска асоцијација предложила со измените на Законот за енергетика постојните фотоволтаични електрани што инсталираат батерии да бидат ослободени од оваа обврска, со што значително би се забрзала реализацијата на инвестициите.
Анѓушев смета дека треба да се размислува и за систем на стимулации за инсталирање батериски системи, затоа што придобивките од нив се пошироки од интересот на поединечните инвеститори.
„Би било паметно да се воспостави некаков систем на стимулација за луѓето да ги поставуваат овие батерии, да им се овозможи да имаат што е можно полесни административни процедури бидејќи не е тоа интерес само на инвеститорите, тоа е поширок интерес за целокупната економија, а и технички интерес на преносниот систем на државата“, заклучува Анѓушев за Bloomberg Adria.