Како наближува крајниот рок се зголемува интересот што владее меѓу средношколците за натпреварот „Средношколец милионер“, кој им нуди единствена можност на младите во Македонија да ја претворат својата идеја во вистински бизнис и да освојат награда од 1.000.000 денари.
Пријавувањето е сè уште отворено, но времето истекува. Според организаторите од Brainster, веќе се пристигнати десетици оригинални и иновативни предлози од средношколци ширум земјата.
Натпреварот има за цел да ја поттикне креативноста, иновативноста и претприемачкиот дух кај младите, како и да покаже дека добрата идеја може да започне во училишна клупа, а да заврши како успешна приказна.
Освен индивидуалната конкуренција, натпреварот создава и друг предизвик:
-која гимназија ќе се покаже како најкреативна,
-кој град ќе ја понесе титулата најиновативен,
-и каде ќе заврши вредниот „трофеј“ – еден милион денари.
Организаторите повикуваат сите ученици што имаат идеја – без разлика дали е поврзана со технологија, екологија, образование, дизајн или социјална промена – да се пријават што поскоро и да станат дел од највредниот средношколски натпревар во земјата.
Пријавувањето е во тек на milioner.mk, а финалето ќе се одржи во организација на Brainster и NU High School Academy.
За пријава не се бараат никакви средства или посебни услови.
