Според податоците на Европската комисија, малите и средни претпријатија (МСП) кои добиле менторска поддршка имаат за 70% поголема шанса да опстанат во првите пет години од своето постоење, во споредба со оние што не користеле таква поддршка. Менторството сè повеќе се препознава како клучна алатка за подобрување на менаџерските вештини, носење стратешки одлуки и зголемување на конкурентноста кај овие претпријатија.
Во таа насока, претпријатието „Кокино Вино“ од Куманово, која започна со производство на вино уште во 2005 година, е еден од примерите за успешно користење на “стандизирана менторската услуга” која се реализира преку Агенцијата за поддршка на претприемништвото (АППРМ).
По иницијалната инвестиција во винаријата, ова претпријатие започна со реализација на новата деловна идеја за вински туризам и угостителство, но при спроведување на оваа идеја наиде на повеќе предизвици – потреба од јасна маркетинг стратегија, план за зголемување на туристичкиот капацитет, нови извори на финансирање итн..
Преку стандардизираната менторска услуга на АППРМ, претпријатието доби стручна поддршка во дефинирање на својот развоен пат. Менторот кој работеше со компанијата помогна во поставување на нова маркетинг стратегија, организациска поставеност на новиот бизнис модел и дефинирање на план за дигитална промоција. Дополнително, во рамките на програмата за менторство беа предложени конкретни чекори за проширување на капацитетите – изградба на апартмани, категоризација на објектот и зголемување на производствените можности.
Дополнително, преку програмата „Ваучерски систем на советување“ која исто така се реализира преку АППРМ, претпријатието доби поддршка за изработка на современа веб-страница и активности поврзани со промоција на социјалните мрежи, со 50% кофинансирање на трошоците за ангажирање стручен маркетинг советник.
Како резултат од сето тоа, „Кокино Вино“ веќе реализираше изградба на нови апартмани, инсталираше фотоволтаична соларна централа и го зголеми бројот на вработените. Во тек се и постапки за категоризација на туристичкиот капацитет и зголемување на производствениот капацитет на вино.
Сопственикот на претпријатието, Андреј Петковски вели дека процесот на менторство бил клучен во донесување на одлука за реализација на нови идеи: „Менторството ни помогна да размислуваме поиновативно, да бидеме покреативни и подготвени да прифатиме промени. Тоа е особено важно за семејните компании како нашата. Сега се движиме нагоре – растеме и се развиваме.“
Директорката на АППРМ, Даниела Димовска,ги повикува сите МСП кои имаат потреба од стручна поддршка која ќе помогне во нивниот развој, и кои се среќаваат со проблеми и предизвици во нивното редовно работење да ги следат програмите, повиците и можностите кои ги нуди Агенцијата, особено во делот на менторските услуги и поддршка, преку која програма искусни и обучени ментори помагаат при надминување на проблемите и предизвиците со кои се соочуваат претпријатијата. Преку учество во “стандардизираната менторска услуга” голем број македонски МСП ги остварија своите деловни цели, станаа поефикасни во своето работење и остварија позитивни финансиски резултати.
Димовоска потенцира дека менторството е еден од највредните ресурси што Агенцијата им го нуди на малите и средни претпријатија – „Претпријатијата кои се приклучуваат на програмите добиваат поддршка не само за решавање на тековните проблеми со кои се соочуваат компаниите, туку се нуди и дефинирање на јасна визија за иднината”.
Остануваме посветни и во иднина да ги поддржиме овие претпријатија преку оваа и други активности и мерки, зошто токму овие претпријатија се генератори на економски раст и развој и поради тоа како државна институција која обезбедува поддршка за МСП имаме обврска да им помогнеме на овие претпријатија да станат поконкуренти на домашниот и странските пазари преку обезбедување на техничка и советодавна поддршка.