И покрај добрата дигитална подготвеност на граѓаните, прифаќањето на електронски плаќања кај малите трговци останува ограничено и претставува еден од најголемите предизвици за платниот систем во земјава, истакна вицегувернерот на Народната банка, Игор Величковски.
На отворањето на работилницата „Премостување на јазот кај прифаќањето на електронските плаќања од страна на трговците“, организирана во соработка со Светската банка, Величковски посочи дека 84% од граѓаните поседуваат платежна сметка, а три од четворица корисници користат дигитални канали за плаќања. Покриеноста со интернет и мобилна мрежа надминува 90%.
Сепак, повеќе од 90% од плаќањата кај малите трговци сè уште се во готовина. Од околу 16.700 трговци, само околу 36.000 уреди овозможуваат електронски плаќања, што укажува на нерамномерна и концентрирана употреба.
„Клучниот предизвик не е подготвеноста на граѓаните, туку ограничената можност на малите трговци да прифаќаат дигитални плаќања. Тие сè уште ги сметаат за скапи и сложени“, рече Величковски.
Тој посочи дека решението лежи во воведување поедноставени модели, како инстант плаќања преку клон на ТИПС, QR кодови, плаќања преку алијаси и инстант потврди за трансакции.
Вицегувернерот ја нагласи соработката со Светската банка во реформите, вклучително приклучувањето кон СЕПА и модернизацијата на платниот систем, со цел секој мал трговец лесно и евтино да прифаќа дигитални плаќања.