Македонија и Бугарија минатата година размениле стоки во вкупна вредност од 1,317 милијарди евра, наведе бугарскиот заменик-министер за економија и индустрија Антон Костадинов на отворањето на Бугарско-македонската стопанска комора и придружниот Бугарско-македонски бизнис форум.
Пред претставниците на повеќе од 80 компании од двете земји што присуствуваа на настанот Костадинов го истакна потенцијалот за проширување на билатералната соработка, посочувајќи дека Министерството за економија и индустрија го гледа форумот како можност за забрзување на трговските и економските односи.
„Приоритет е да се поддржат иницијативите што ги олеснуваат инвестициите и ги отстрануваат административните и логистичките бариери“, рече тој.
Костадинов ја истакна важноста на секторите енергетика, градежништво, фармацевтска индустрија, туризам и земјоделство како клучни за развојот на економиите на двете земји. Тој, исто така, ја нагласи потребата од подобрување на транспортот и дигиталното поврзување меѓу Софија и Скопјe како клучен фактор за промовирање на бизнисот и инвестициите.
Во својот говор, Костадинов им честиташе на иницијаторите за основањето на Бугарско-македонската стопанска комора со седиште во Софија и истакна дека здружувањето на напорите со Македонско-бугарската стопанска комора од Скопјe е јасен знак за синхронизираност и заедничка визија за развој. Според него, новоформираната комора има потенцијал да се етаблира како партнер на малите и средните претпријатија, преку помагање во спроведувањето на заеднички проекти и продлабочување на економската соработка.
Настанот беше организиран од Бугарската стопанска комора (БТСК). Целта му е да ја зајакне економската соработка меѓу компаниите од Бугарија и Македонија, како и да отвори нови можности за инвестиции, партнерства и заеднички проекти.
На форумот присуствуваа и македонската амбасадорка Агнеза Руси-Поповска, претседателот на Бугарско-македонската стопанска комора, Атанас Радев, претседателот на Македонско-бугарската стопанска комора, Билјана Митева, како и Васил Тодоров, заменик-претседател на БТСК.