Голманот Борко Ристовски се обрати на јавноста по критиките за него, како и за колегите од ракометната репрезентација на Македонија и за Стручниот штаб, по поразот од Чешка на Европското првенство.

„Морам да признаам дека не спиевме најдобро, барем јас. И не треба да се спие мирно после секој пораз. Таков е спортот… Тоа е притисок, разочарување, едноставно емоциите кога играте за својот народ и држава се преголеми. Јас сум во репрезентацијата околу 15 години и морам да признаам дека првпат го почувствував притисокот на политиката на свој грб.
Убаво школо. Корисен дел од мојот живот во и надвор од спортот. Меѓутоа, оние што ме познаваат знаат дека јас не сум човек што се откажува, ниту повлекува. Бидете сигурни дека нема да се повлечам ниту чекор назад на нападите и критиките кои што се дел апсолутно заслужени и ги прифаќам, но поголем број се оркестрирани политички, но има и такви што се лични фрустрации.

„Велат дека глувците излегуваат на површина во случај на поплави и земјотреси. Така и сега. Ова се нивните 5 минути. Нека ги искористат добро, затоа што многу брзо ќе завршат.
Ние (репрезентацијата) имаме незавршена работа во Виена. Нè чека натпревар кој е премногу важен за да ги разочараме вистинските македонски навивачи и оние поддржувачи кои одвоиле од својата уста за да дојдат тука и да нè бодрат, и сите оние што испратија неколку илјади пораки изминатата ноќ.
Ете затоа се игра за Македонија. Заради својата гордост, својата чест. Честа на своето семејство и народ. А сите оние на кои им пречат македонското знаме, македонската химна, македонскиот народ, се во огромно малцинство, за наша среќа.

Затоа, воопшто не е важно кој за која партија е. Важно е во вторник сите заедно сплотени да одиме на победа која нè носи во вториот круг. Да живее Македонија!🇲🇰🇲🇰🇲🇰“, порача на Фејсбук „министерот за одбрана“ и стратешки соработник за спорт на лидерот на ВМРО-ДПМНЕ, Христијан Мицкоски.

SHARE