Основното јавно обвинителство во Битола поведе кривична постапка против 40-годишен маж, осомничен дека ја противправно лишил од слобода и ја телесно повредил 18-годишна девојка со која бил во блиски лични односи.
Според обвинителството, инцидентот се случил на 23 мај во раните утрински часови. Девојката се враќала од матурска прослава кога осомничениот ја пресретнал со автомобил. Таа влегла во возилото, по што тој ѝ го зел мобилниот телефон, не ѝ дозволувал да излезе и ја возел на непозната локација.
„Оштетената го молела да ја пушти да излезе и кога запреле на една локација се обидела да го напушти возилото, но осомничениот тргнал по неа и започнал да ја удира“, соопшти Обвинителството.
Потоа, тој повторно ја вовлекол во автомобилот и продолжил да ја напаѓа со тупаници, нанесувајќи ѝ телесни повреди и крварење од носот. Девојката успеала да се ослободи и со помош на случаен минувач побарала помош.
Обвинителството бара определување мерка притвор за осомничениот, наведувајќи дека постои опасност од бегство, дека тој и претходно се јавувал како сторител на насилство и други кривични дела, како и дека начинот на извршување на делото укажува на „особено насилнички и контролирачки порив“ кон жртвата.