Деветгодишен ученик во основно училиште во Велика Горица, Хрватска, почина вчера откако се задави со парче крофна за време на одморот, објавија хрватски медиуми.
Наставниците веднаш му притрчале на помош, повикале брза помош и започнале со реанимација.
Дежурната докторка во Загребскиот жупански завод за итна медицинска помош, Сања Кос, која учествувала во интервенцијата, вели дека детето јадело крофна „и очигледно вдишало големо парче во дишните патишта. Децата што биле до него рекле дека посинело, престанало да дише и ја изгубило свеста и се струполило“.
Кога екипата за итни случаи пристигнала во училиштето, наставниците веќе изведувале срцева масажа и вештачко дишење.
„Детето веќе беше сино и не одговараше на повици ниту на допир. Не дишеше, а срцето не му чукаше. Продолживме со постапката за реанимација, но во еден момент забележавме одредени знаци на смрт. Ја прекинавме реанимацијата во 15:35 часот“, рече докторката.
Реанимацијата траеше речиси 50 минути
Според докторката, реанимацијата, која ја започнаа наставниците, а потоа ја продолжија работниците од итната помош, траеше помеѓу 45 и 50 минути.
Според докторката Кос, случаите на задушување со храна, иако ретки, се случуваат и дека е важно навреме да се препознае дали станува збор за лесна или тешка форма на задушување и веднаш да се примени прва помош.