Тетовската полиција попладнево лишила од слобода тетовец што се обидел да изврши разбојништво во угостителски објект под дејство на алкохол и со закана со пиштол.
„Во 16 часот на улица ‘Илинденска’ во Тетово, полициски службеници од СВР Тетово го лишиле од слобода Х.Д. (22) од Тетово. При преглед кај него бил пронајден и одземен еден гасен пиштол, а по извршено алкотестирање било утврдено дека е под дејство на алкохол, односно му биле измерени 1,35 промили алкохол во крвта.
Претходно, во СВР Тетово А.И. (38) од Тетово пријавил дека околу 15:30 ч. на неговото работно место во угостителскиот објект Х.Д. врз него извршил обид за разбојништво. Имено, според пријавеното, тој влегол во објектот и со закана со пиштол побарал од вработениот А.И. да му ги даде парите. Откако А.И. одбил и му рекол да излезе, помеѓу нив настанала физичка пресметка, при што со кундакот од пиштолот го удрил А.И. во пределот на главата.
Потоа, Х.Д. побегнал од местото, но набргу по преземени мерки е пронајден и лишен од слобода. Тој е задржан во полициска станица и по целосно документирање на случајот против него ќе биде поднесена соодветна пријава“, соопшти Министерството за внатрешни работи.