Македонија со демократија на ниво на Украина, полоша од Албанија

Британскиот весник „Економист“ трета година едноподруго ја стави Македонија во групата хибридни режими, сместувајќи ја на 78. место меѓу 165 земји и две територии со индекс на демократија 5,87 од можни 10.

Македонската демократија во 2018 година била на ниво на таа во Украина, Ел Салвадор и Боливија, а од девет земји од опкружувањето е полоша од шест, вклучувајќи ја и Албанија со индекс на демократија 5,98. Подобри од Македонија се и Словенија со 7,50, Грција со 7,29, Бугарија со 7,03, Хрватска со 6,57 и Србија со 6,41, а полоши се само Црна Гора со 5,74 и Босна и Херцеговина со 4,98.

Македонија најдобро стои во категоријата граѓански слободи со индекс 7,06, а најслабо според политичката култура (3,75). Владата добила оценка 5,36, изборниот процес и плурализмот 6,50 и учеството во креирањето политики 6,67.

Најдемократска држава во светот минатата година била Норвешка со индекс 9,87, а на дното е Северна Кореја со 1,06.

SHARE