Агенцијата за аудио и аудиовизуелни медиумски услуги ги отфрла како неточни и неосновани наводите на ММА и МРТ за погрешно третирање на програмските сервиси Arena M1, Arena M2 и Arena M3 Premium како странски програмски сервиси кои се реемитуваат во Република Македонија.
Реакцијата дојде по објавата на Македонската медиумска асоцијација (ММА) и јавниот сервис МРТ кои упатија жестоки обвинувања до Агенцијата за аудио и аудиовизуелни медиумски услуги тврдејќи дека регулаторот им овозможува на каналите „Arena M1“, „Arena M2“ и „Arena M3 Premium“ да работат спротивно на законот. Според телевизиите, АВМУ реагираше со категорично отфрлање на овие наводи како неосновани.
Од ММА и МРТ истакнуваат дека поседуваат материјални докази кои покажуваат дека овие спортски канали со години функционираат без домашна дозвола за емитување, иако целокупниот производствен процес се одвива во земјава.
Телевизиите бараат Обвинителството и МВР да испитаат дали е направена штета врз државниот буџет, кој е одговорен во АВМУ и дали има неовластено користење на премиум спортски ТВ-права.
АВМУ во реакцијата вели постапува исклучиво во рамките на своите законски надлежности согласно Законот за аудио и аудиовизуелни медиумски услуги. Постапувањето на Агенцијата во конкретниот случај се заснова на релевантна доставена документација, како и на информации и податоци добиени од надлежни институции во Република Македонија и од релевантни странски субјекти.
Врз основа на расположливата документација и добиените информации, предметните програмски сервиси се третираат како странски програмски сервиси кои се реемитуваат, а не како домашни телевизиски сервиси што емитуваат програма на територијата на државата, имајќи предвид дека нивниот изворен сигнал не се емитува на територијата на Република Македонија.
Агенцијата особено ги отфрла инсинуациите дека со своето постапување овозможува заобиколување на законските обврски или дека постои каква било незаконитост во постапувањето на Агенцијата и нејзините службени лица.
,,Доколку ММА и МРТ располагаат со наводни докази за незаконско постапување на Агенцијата ги повикуваме истите да ги достават до надлежните институции. Во меѓувреме, посочуваме дека е недозволиво исклучиво поради сопствени интереси да се шират неосновани квалификации и инсинуации кои создаваат впечаток за незаконито или произволно постапување на регулаторот”, се вели во реакцијата на АВМУ.