По 17 години, Законот за возила конечно ќе почне правилно да се применува. Од 1 септември 2025 година стартуваат измените во постапките за одобрување возила, информираше министерката за енергетика, рударство и минерални суровини Сања Божиновска, која денеска одржа работен состанок со над 40 овластени застапници и импортери на возила.
Новините предвидуваат забрзување и поедноставување на процесот за одобрување типови возила, гарантирање разумни цени за потврди за технички карактеристики и враќање на околу 1,3 милиони евра кај македонските компании, со тоа што процесот ќе се регулира преку домашни овластени застапници.
“Со ова се воспоставува доверба меѓу институциите, застапниците и граѓаните. Законот конечно ќе се применува според европските стандарди, создавајќи фер, транспарентен и европски систем во кој граѓаните се заштитени, а македонските компании добиваат фер услови,“ истакна Божиновска.