Директорката на Институтот за јавно здравје (ИЈЗ), Марија Андоновска, на денешната прес-конференција изрази надеж дека Јавното обвинителство ќе реагира за сериозните неправилности утврдени во извештајот на Државниот завод за ревизија, кои се случувале пред нејзиното доаѓање на чело на институцијата.
„И мене некои работи ми изгледаа нестварно штом дојдов на оваа функција, што се случувало пред јас да дојдам на позицијата“, рече Андоновска.
Таа посочи дека при нејзиното доаѓање констатирале дека немало реагенси, а немало ниту евиденција за нив. Дел од вработените примале плата, а не доаѓале на работа, додека некои колеги ги евидентирале дека се присутни, а за возврат добивале пари.
Меѓу другите неправилности што ги наброја, Андоновска ги спомена:
- Прием на работа без административен испит;
- Неправилни унапредувања и исплата на додатоци;
- Несоодветно наградување на вработени;
- Набавка на непотребна медицинска опрема;
- Фармацевтски техничари извршувале работи на медицински сестри и лаборанти;
- Договори на дело со веќе вработени лица;
- Издавање на простор на ИЈЗ на пекарница, што е спротивно на законот;
- Јавни набавки што не биле предвидени во годишниот план.
Таа даде и конкретен пример: некои вработени добивале од 44.000 до 88.000 денари дополнително на плата за „архивска граѓа“, како на пример чистење на двор.
Андоновска апелираше да не се ставаат сите вработени во ист кош, истакнувајќи дека поголемиот дел чесно и професионално ја вршеле својата работа. Таа увери дека поголемиот дел од неправилностите сега се надминати.