Грчките власти во Егејска Македонија најдоа начин како да им застанат на патот на игранките по селата на кои се игра и пее на македонски, а притоа да избегнат обвинувања за кршење на граѓанските и човекови права.
„Музичките фестивали во селата во близина на Лерин беа откажани затоа што луѓето танцуваа и пееја на македонски јазик. Две здруженија мораа да откажат, за да избегнат лицемерни казни во врска со часовите на јавна тишина“, алармира на социјалната мрежа Икс активистот и член на Грчкиот Хелсиншки монитор, Василис Царнас.
Како што нагласуваат локалните медиуми, вознемирувачки бил фактот што на локалните фестивали во Лерин, учесниците, илјадници млади мажи и жени, танцуваат и пеат на македонски јазик?!
Партијата НИКИ дури слави со своето соопштение дека со сопствена интервенција во Општина Аминдео и обвинителот на Лерин, секогаш „со тешко срце“, успеала да ги спаси „чистите и убави традиционални фолклорни фестивали во нашиот регион Македонија“, кои, сепак, се трансформираат особено во овој регион „во места за промовирање на иредентистичката пропаганда на Скопската Република. Често се користат специфични оркестри кои презентираат репертоар сосема туѓ на нашите локални традиции“.
За оваа појава извести и телевизијата TVXS со наслов „Лерин / Ги откажуваат панаѓурите во селата затоа што танцуваат и пеат на македонски јазик“.