По одлука на парламентот, поголемиот дел од Гренланд од 31 октомври 2027 година ќе премине на старата временска зона ГМТ-3. Со тоа островот се оддалечува од европското сметање на времето, кое го прифати во 2023 година.
Временската разлика со Копенхаген ќе порасне на четири часа, додека со Вашингтон ќе се намали на два часа. Летното сметање на времето останува во сила.
Преминот на ГМТ-2 пред три години беше направен со цел подобро усогласување со Данска и Европа.
Сега, по притисок од дел од населението, се прави враќање. За оваа промена биле собрани околу 4.000 потписи во земја со близу 56.000 жители.
Премиерот Јенс-Фредерик Нилсен беше против одлуката. Тој предупреди дека враќањето може да нанесе економски штети, бидејќи главните трговски партнери на Гренланд се во Европа.
Нилсен укажа и дека ќе се скрати времето за консултации на здравствениот систем со дански специјалисти, а можно е да се појават и потешкотии во воздушниот сообраќај кон Европа.
И покрај предупредувањата, значителен дел од жителите ја поддржуваат промената и сметаат дека ГМТ-3 подобро одговара на географската положба и секојдневниот живот на островот.