Ќе се обнови Саат кулата во Тетово, најави Билал Касами, актуелен градоначалник на Тетово и кандидат на Коалицијата „Вреди“ на локалните избори за уште еден градоначанички мандат.
– Еден од најважните проекти е изградбата на Саат кулата, токму овде, покрај Саат џамијата, на местото каде што пред многу векови стоела првата Саат кула. Со тоа му го враќаме на Тетово неговиот оригинален идентитет и му додаваме уште една туристичка атракција на нашиот богат град. Покрај тоа, ќе изградиме современа библиотека и читална, опремени со современа литература, простории каде што младите ќе можат да учат и да се развиваат. Ќе формираме општинска културна установа, ќе воспоставиме нови културни и уметнички манифестации и ќе ги поддржиме младите креатори. Тетово ќе биде жив и активен град во областа на уметноста и културата – рече кандидатот Касами.
Саат кулата во Тетово била изградена од Мехмед Паша во 1608 година. Тоа била монументална градба со квадратна основа, која преминувала во многуаголна и завршувала со интересен покрив. Таа го красела градот до 1933 година, кога била урната поради дотраеноста. Веќе подолго време постои иницијатива за возобновивање на кулата.
– Во првиот мандат го разбудивме културниот дух на Тетово, по долг период на летаргија и незаинтересираност од страна на општината. Тетово повторно го претворивме во културен и уметнички центар за жителите, онака како што му прилега на нашиот град, со десетици настани, активности, фестивали и организации. „Тетовско лето” ги обедини сите генерации во нашиот град, во една прослава на животот, уметноста, културата и спортот. Се погриживме Тетово да ги одразува и своите историски вредности. На „улицата на бутиците” односно улицата Радован Цониќ поставивме калдрма, давајќи ѝ го изгледот што го заслужува. Нашата поддршка за културата и уметноста ќе продолжи и во следниот мандат. Тетово продолжува напред, со Второто поглавје на развојот: уште повеќе, уште подобро, уште посилно – рече Касами.