Според најновите информации на Автомото сојузот на Македонија (АМСМ), сообраќајот на државните патишта низ земјата се одвива непречено, по суви коловози. Интензитетот на сообраќај надвор од градските средини е умерен, а на граничните премини од македонска страна нема подолги задржувања.
Од АМСМ препорачуваат прилагодена брзина на движење, почитување на сообраќајната сигнализација и внимателно управување со возилата, особено на ризичните делници низ котлини, речни долини и клисури каде постои можност од одрони.Најризични делници се:
- Катланово – Велес,
- Маврово – Дебар – Струга,
- Виница – Берово,
- Кочани – Делчево.
Сезонски и летен режим на сообраќај
Од 15 април, патниот правец Охрид – Ресен преку Националниот парк Галичица е отворен за сите видови возила до 3,5 тона.
Од 1 јули до 31 август се воведува летен временски режим со забрана за движење на тешки товарни возила со вкупна маса над 15 тони за време на викендите и денови со екстремно високи температури:
- Петок: 17:00 – 22:00 часот,
- Сабота: 09:00 – 18:00 часот,
- Недела: 09:00 – 22:00 часот.
Во денови со екстремни температури (определени од Министерството за здравство), забраната ќе важи и од понеделник до четврток од 11:00 до 17:00 часот.
Ова ограничување не важи за возила кои превезуваат животни, цвеќе, хуманитарна помош, жито, леснорасиплива стока, нафта и нафтени деривати, опасни материјали, како и за возила кои вршат превоз за државни проекти.
Дополнително, на магистралниот пат А2 (Скопје – Охрид – Скопје), важна до 1 септември, се забранува движење на тешки товарни возила над 7,5 тони за време на викендите во следните интервали:
- Петок: 15:00 – 22:00,
- Сабота: 07:00 – 12:00 и 18:00 – 24:00,
- Недела: 07:00 – 22:00.
Целта на овие мерки е да се намалат застоите и да се обезбеди побрз проток на возила, особено кон најпосетуваните туристички дестинации.