Угледниот македонски научник и долгогодишен професор на Универзитетот во Олборг, Петар Поповски, објави дека е примен за член на престижната Кралска данска академија на науките и книжевноста.
„Привилегиран сум што станав член на Кралската данска академија на науките и книжевноста, чијшто некогашен претседател е еден од моите херои, Нилс Бор. Би сакал да им се заблагодарам на научниците што ја поддржаа мојата номинација и со нетрпение очекувам да придонесам за активностите на Академијата преку призмата на теоријата на комуникацијата и технологијата“, напиша Поповски на социјалните мрежи.
Од Кралската академија соопштија дека 30-те новопримени членови ќе бидат дел од напорите за зајакнување на научните истражувања во корист на општеството, следејќи ги стапките на истакнати научници како Нилс Бор и Ханс Кристијан Орстед.
Петар Поповски, роден во Охрид во 1973 година, дипломирал на Електротехничкиот факултет во Скопје во 1997 година, магистрирал во 2000 година, а докторирал во 2004 година на Универзитетот во Олборг во областа на безжичните комуникации.
Тој е еден од водечките светски експерти за безжични комуникациски системи и комуникациска теорија. Покрај ангажманот на Универзитетот во Олборг, Поповски е визитинг професор на Универзитетот во Бремен, главен уредник на IEEE Journal of Selected Areas in Communications, претседател на IEEE Communication Theory Technical Committee и член на Данскиот истражувачки совет за технологија и производство.
Во својата богата научна кариера е автор или коавтор на повеќе од 300 научни трудови објавени во реномирани списанија и конференции, а зад себе има и повеќе од 30 патенти и патентни пријави.
Неговата сопруга, Искра Дуковска-Поповска, исто така е дел од академската заедница како вонреден професор на Универзитетот во Олборг, каде што работи во областа на управување со операции, синџири на снабдување и одржлив развој.