По сончевото и топло утро, попладнево во повеќе делови од земјата се очекува локална нестабилност со пороен дожд, грмежи и засилен ветер, додека од почетокот на новата седмица времето повторно ќе се стабилизира.
Според прогнозата на Управата за хидрометеоролошки работи (УХМР), денот ќе започне со променливо облачно време и сончеви периоди, а попладнево во многу региони ќе има услови за краткотраен, но интензивен дожд и грмежи.
Во западните делови ќе дува умерен, повремено засилен ветер од западен правец, а во источниот дел од земјата ќе преовладува северозападен ветер со умерен до локално силен интензитет.
Утринските температури ќе се движат од 11 степени во Берово до 15 степени во Гевгелија, додека дневните ќе достигнат од 27 степени во Маврово до 37 степени во Гевгелија.
Во Скопје денеска ќе биде сончево со мала до умерена облачност, а попладнево во делови од котлината постои можност за краткотраен дожд. Ќе дува умерен северен ветер, а температурата ќе се движи од 13 до 32 степени.
Од понеделник повторно ќе преовладува сончево време со мала до умерена локална облачност. Ќе дува умерен, а во источните делови повремено засилен северен ветер. Минималните температури ќе се движат од 10 до 20 степени, а дневните од 28 до 35 степени.
Слично време се очекува и во вторник, кога ќе биде сончево со мала локална облачност и умерен, наместа засилен северен ветер. Утринските температури ќе бидат од 11 до 20 степени, а максималните од 30 до 37 степени.