Праксата на педантна употреба на непостоечката етничка припадност „Северноимакедонци“ во Бугарија не ја избегна ни бугарскиот европратеник Емил Радев додека ѝ држеше предавање на Македонија во интервју за тамошното Радио Дарик.
„Надворешната политика е многу важна тема во Европскиот парламент. Претстои усвојувањето на извештајот за Република Северна Македонија. Станува збор за процесот на пристапување кон Европската унија и за тоа колку се подготвени тие. Овој извештај, како и во претходните години, крие голема опасност. Минатата година се обидоа да го наметнат македонскиот јазик. Европскиот став е дека Бугарите треба да бидат запишани во Уставот на Северна Македонија и ова е еден од условите за процесот на интеграција на земјата со ЕУ воопшто да продолжи. Северномакедонците се обидуваат да тврдат дека ова се билатерални односи меѓу нив и Бугарија. Не, ова се односи на Европската унија со Северна Македонија. Мило ми е што во Европскиот парламент сите 17 европратеници имаат заеднички став и се бориме овој извештај да го одразува ставот на Европската унија и на Бугарија. Ставот на Министерството за надворешни работи на Бугарија е многу важен“, изјави бугарскиот европратеник од ГЕРБ на експремиерот Бојко Борисов.
„Во моментов, Северна Македонија не ги исполнува условите за влез во Европската Унија. Членството на Северна Македонија во Европската Унија воопшто не е блиску“, додаде Радев.
„Северничењето“ на Македонците од членот на ЕП од Бугарија доаѓа само една недела откако македонското Министерство за надворешни работи и неговиот прв човек Тимчо Муцунски реагираа за изразот „северномакедонски партнери“ употребен од шефицата на бугарската дипломатија Велислава Петрова-Чамова.
Дека измислицата „Северномакедонци“ се доживува како омаловажување и навреда од Македонците (им) укажа и поранешниот премиер Љупчо Георгиевски, кој за време на премиерувањето на Зоран Заев во неколку наврати беше во објаснувачка мисија во Софија.