Универзитетската клиника за хируршки болести „Свети Наум Охридски“ денеска ја збогати својата опрема со најсовремен апарат за магнетна резонанца од 1,5 Тесла, два лапароскопски столбови и целосен инструментариум за трауматолошките сали. Вредноста на донацијата, обезбедена преку Владата на Република Македонија, изнесува околу 90 милиони денари или 1,5 милиони евра.
На свеченото пуштање во употреба присуствуваа премиерот Христијан Мицкоски, министерот за здравство Азир Алиу и директорот на Фондот за здравствено осигурување, Сашо Клековски.
Директорот на Клиниката, д-р Небојша Настов, не го криеше задоволството:
„Пресреќен сум што имам можност да презентирам дел од опремата која ја добивме со помош на Владата. Со овие нови генерации апарати за магнетна резонанца се скратува времетраењето на прегледите, односно се зголемува бројот на прегледи кои може да се извршат во текот на еден ден. Ако во претходниот период со стариот апарат од пред 16 години правевме 4.000 магнетни резонанци годишно, сега очекуваме најмалку 5.000, а можно е и повеќе – во зависност од организацијата на смени“, изјави д-р Настов.
Новата опрема значително ќе ги скрати листите на чекање и ќе ја подигне квалитетот на дијагностиката и хируршките интервенции на највисоко ниво, со што „Свети Наум Охридски“ продолжува да се позиционира како водечка хируршка установа во земјата.