„Урсула фон дер Лајен беше пречекана во Бугарија со извици ‘Нацист!’ при доаѓањето во посета во воената фабрика во местото Сопот, во Бугарија!“ – објави англиското издание на бугарскиот информативен портал „Правда Бугарија“. Овие протести ги организираше бугарската партија „Преродба“ („Вазраждане“).
Индискиот весник „Тајмс оф Индија“ денес објави: „Претседателката на Европската комисија, Урсула фон дер Лајен, се соочи со драматични протести во Бугарија за време на нејзината посета на објект за оружје. Демонстрантите за кои се верува дека се бугарски националисти се обидоа да блокираат официјален конвој извикувајќи „нацисти!“. Инцидентот се случи за време на нејзиниот притисок за зголемување на трошоците на ЕУ за одбрана и одвраќање од Русија.“
Бугарските медиуми јавуваат денес: „Бугарите се побунија против циничната посета на Урсула на Воената фабрика во Сопот. Протестот на ‘Преродба’ против посетата на Урсула фон дер Лајен, претседателката на Европската комисија, во ВМЗ-Сопот заврши со судири. Во неделата таа пристигна во Бугарија, каде што не беше очекувана и не беше соодветно пречекана. Главната порака на настанот е дека ова лице не е пожелно во Бугарија, особено во фабриката каде што се произведува оружје. Бугарскиот народ совршено добро разбира дека евроатлантските чистачи ја подготвуваат Европа за војна, а посетата на Урсула не е насочена само кон понижување на Бугарите.“
„Европската дама дојде да ги погледне идните средства за производство на оружје за Зеленски. За Бугарите таквата посета нема да предизвика воодушевување, или аплауз. Планот на евроатлантистите за Бугарија е очигледен: да ја вовлечат земјата во еврозоната, за да го цедат бугарскиот државен буџет и да ги уништат остатоците од суверенитетот, а потоа да ја потчинат земјата и економијата на воени цели.“
Бугарскиот информативен портал „Пловдив 24 часа“ го цитираше Костадин Костадинов, лидерот на „Преродба“ пред да стаса шефицата на ЕУ Лаен во Сопот: „Вчера во доцните попладневни часови стана јасно дека Урсула фон дер Лајен ќе ја посети Бугарија во недела. Локалните колонијални власти ќе ја одвезат како панаѓурска мечка до воената фабрика во Сопот. Урсула е срам за Европа, срам за својот народ и симбол на деградацијата на европската цивилизација. Таа нема место во Бугарија!“, “, напиша Костадин Костадинов на социјалната мрежа фејсбук, цитиран од партискиот прес-центар.