Кандидатот за градоначалник на Град Скопје од ВМРО-ДПМНЕ, Орце Ѓорѓиевски, најави дека една од првите реформи што ќе ги спроведе по преземањето на функцијата ќе биде формирање на градска градежна инспекција – независен орган кој ќе обезбеди еднаков третман за сите и ќе стави крај на селективното постапување во градежништвото.
„Никој нема да има повластувања наспроти некој друг. Она што недостасува во синџирот е Град Скопје да има сопствена инспекција,“ изјави Ѓорѓиевски во гостувањето во утринската емисија „Стадион“ на Канал 77.
Тој нагласи дека токму искуството стекнато како градоначалник на Општина Кисела Вода е доказ дека законитоста и редот во урбанизмот можат да се воспостават со систематски пристап и професионални служби.
„Во Кисела Вода нема ниту еден случај на незаконско градење каде што нашите служби не постапиле,“ потенцираше Ѓорѓиевски, додавајќи дека инспекторите од Кисела Вода често помагале и во други општини на барање на колегите градоначалници.
Како дополнителна опција, тој ја спомена и можноста за централизирани инспекции на ниво на град, со јасна хиерархија и одговорност.
„Целта е да се воспостави ред и професионализам – Скопје да стане град каде што владее закон, а не привилегии,“ порача Ѓорѓиевски.