Македонија

За 35% помалку жртви помалку на патиштата од лани

Стратегијата за безбедност доби поддршка од Комисијата

До 27 август годинава, на патиштата во државата загинале 59 лица, што е за повеќе од 35 проценти помалку во споредба со истиот период лани, кога биле евидентирани 96 жртви. Во текот на целата 2025 година, во сообраќајни незгоди загинале 132 лица, додека во 2024 година животот го загубиле 142 лица.

Овие податоци ги изнесе министерот за внатрешни работи Панче Тошковски пред членовите на собраниската Комисија за одбрана и безбедност, каде што ја образложи Предлог-националната стратегија за безбедност на сообраќајот на патиштата 2026-2030. Комисијата го проследи документот на понатамошна пленарна постапка.

Тошковски посочи дека Македонија и натаму има речиси двојно повисока стапка на смртност во сообраќајот од европскиот просек. Во Европската Унија таа изнесува околу 43 до 44 жртви на еден милион жители, додека во земјава се движи меѓу 78 и 80 жртви на милион жители.

Според министерот, главната цел на стратегијата е спасување човечки животи.

– Стратегијата е изготвена врз основа на светската рамка кон која се стреми секоја европска држава, а тоа се „Vision Zero“ и „Safe System“. Тоа е рамка чија цел е до крајот на 2050 година да имаме нула жртви како последица на непочитување на сообраќајните правила – порача Тошковски.

Пред членовите на Комисијата, министерот нагласи дека документот предвидува до 2030 година бројот на сообраќајни незгоди да се намали за 50 проценти во однос на 2024 година – од околу 8.500 на приближно 4.250 незгоди.

Целта е и бројот на загинати лица да се преполови, од 142 на 71, а бројот на тешко повредени да се намали од околу 1.100 на 550 лица.

Стратегијата предвидува и зголемување на употребата на сигурносни појаси и заштитни шлемови на над 90 проценти.

Според предложената стратегија за периодот 2026-2030 година, меѓу клучните приоритети се подобрувањето на управувањето со безбедноста во сообраќајот, развојот на побезбедна патна инфраструктура, зајакнувањето на безбедноста на возилата, унапредувањето на сообраќајната култура и едукацијата, како и подобрувањето на системот за итна помош по сообраќајни незгоди.

Документот е заснован на принципот „Секој живот е важен“ и предвидува примена на концептот „Безбеден систем“, со поголема институционална координација, употреба на современи технологии и засилени превентивни и контролни мерки.

Предлог-стратегијата предвидува и воспоставување национален систем за интелигентен мониторинг и управување со сообраќајот, редовни безбедносни ревизии на патиштата, унапредување на техничката исправност на возилата и континуирана едукација на сите учесници во сообраќајот.

По расправата, Комисијата за одбрана и безбедност го утврди текстот на Предлог-стратегијата и го проследи на натамошно разгледување на пленарна седница.

Најнови вести од: Македонија

Аларм: Секое 10-то дете во Македонија изложено на сексуална злоупотреба на интернет

Секое десетто дете во Македонија на возраст од 12 до 17 години коешто користело интернет било изложено на сексуална експлоатација и злоупотреба. Станува збор за околу 12.000 деца, бројка што ја потврдува и последното истражување на УНИЦЕФ.

(Видео): Проблемот со кравите во Крива Паланка стигна до Обвинителството – Општината поднесе кривични пријави

Крива Паланка, заедно со жителите од засегнатите села, поднесоа неколку кривични пријави до Обвинителството поради институционално непостапување по извршни решенија за одземање на добитокот што слободно шета во градот и пошироко.

УКИМ не платил сметки за струја, ако не се плати долгот – факултетите ќе останат во мрак

Дел од државните факултети и Ректоратот од утринава се во мрак поради неплатени сметки за електрична енергија. Ова за Телма го потврдија и од ЕВН. Без струја останаа Машинскиот, Електротехничкиот, Природно – математичкиот, земјоделскиот факултет, но и зградата на Ректоратот.

Велковски: Во владина постапка се измените на Законот за детска заштита, од 2027 поголема поддршка за децата со посебни потреби

Измените на Законот за детска заштита веќе се во владина процедура, каде се предвидува зголемување на постоечките државни износи за поддршка, со посебен фокус на децата со посебни потреби, изјави министерот за труд и социјална политика и млади, Ѓоко Велковски одговарајќи на пратенички прашања во Собранието, нагласувајќи дека се очекува овие измени брзо да ја поминат собраниската процедура и од 1 јануари 2027 година децата од оваа категорија да добијат зголемени средства.

Николоски: Од 1 јануари 2027 државата ќе биде единствен организатор на интернет-игрите на среќа и ВЛТ терминалите

Владата останува на ставот за ограничување на игрите на среќа и веќе презеде конкретни законски мерки со кои се намалуваат можностите за нивно организирање, истакна заменик претседателот на Владата и министер за транспорт, Александар Николоски, одговарајќи на пратеничко прашање на Јована Мојсоска од Левица поврзано со работењето на Државна лотарија, односно дали Владата ќе иницира разрешување на директорот на Државна лотарија, Александар Климовски, како и дали ќе биде затворена платформата за онлајн коцкање „Мегавин“.

To top