Популарниот Фестивал на пивото и скарата, попознат како „Пивофест“, започна да го живее своето 23-то издание. Три дена во градот под Марковите Кули сѐ ќе биде во знакот на оваа манифестација, која низ годините стана еден од најпрепознатливите забавно-музички брендови на градот. Преку 20-тина видови пиво од различни домашни и странски производители, заедно со прочуената прилепска скара, ќе се служат на 15-те штандови кои се распоредени на површина од 3.000 метри квадратни во централното градско подрачје.
„Комплетната инфраструктура е поставена, штандовите поставени, сѐ е подготвено за добар пречек на гостите. Започнуваме попладнево со добро познатите корпоративни дружби, продолжуваме вечерва со забавата, со формалниот дел, со формалното отворање на фестивалот и она што сакам како градоначалник да го кажам, а воедно и да испратам покана од оваа прес-конференција, уште една, завршна – да бидете тука. Главните случувања во РМ во овој период од летото се токму во Прилеп“ – порача градоначалникот на Прилеп, Дејан Проданоски.
Тридневната фестивалска фешта, освен со настапите на познатите музички имиња – Џенан Лончаревиќ, Јордан Митев, Милица Павловиќ, Марјан Коцев, Даниела Мартиновиќ, Огнен Здравковски и други, ќе изобилува и со новини.
„Годинашниот фестивал е на едно повисоко ниво, малку повозбудливо. Ја имаме фан-зоната. Се воведува сликање за граѓаните и посетителите со препознатливите мајмуни со отворени глави, каде што секој може да ја стави главата, да се слика и тие слики потоа можат да се објават на интернет“ – кажа Илија Волчески, актер и водител на Фестивалот.
Инаку, Општина Прилеп како покровител на Фестивалот, годинава ги дуплираше средствата, па финансиски го помогна со 2 милиони денари. За вечерашното официјално отворање најавено е и присуството на претставници од највисокиот политички врв во земјава, односно од Владата. А прилепската чаршија за време на Фестивалот ќе има продолжено работно време.